أحلام و المنتخب و زويل
قامت أحلام من نومها على كابوس و قالت خير اللهم إجعله خير
قام جوزها صابر على صوتها مالك يا أحلام؟؟
خير يا صابر نام إنت
أنام إزاى و انت بقالك تلات ليالى كل يوم تصحينى على الكابوس بتاعك اللى أنا مش عارف إيه هو
خير يا صابر نام و أنا هاتصرف
و قامت أحلام فى الفجر تتصل بخط تفسير الأحلام بتاع 09000؟؟؟ و حكت كابوسها اللى بيطاردها بقاله تلات ليالى و بعد كده بدأت روتين يومها العادى و هى فى ملكوت تانى و فضلت تعد الساعات لحد ما اتصلت تانى و خدت تفسير للكابوس و الحقيقة التفسير من وجهة نظرها كان كابوس أكبر المهم راحت شغلها بالمناسبة أحلام بتشتغل مدرسة فى مدرسة إبتدائى و فشلت فى امتحان الكادر و معاها حمادة ابنها فى نفس المدرسة فى سنة ستة باين و لا خمسة هو إبتدائى بقى كام سنة دلوقتى ؟؟؟؟ ما علينا نرجع للمهم راحت أحلام لإعتماد صاحبتها الأخصائية الإجتماعية فى نفس المدرسة
إلحقينى يا اعتماد انا فى مصيبة
مصيبة إيه خير يا أحلام مالك
حلمت بكابوس و الكابوس اتكرر تلات مرات و اتصلت بالخط إياه بتاع تفسير الاحلام و التفسير كان كابوس اكبر
طيب إهدى كدة و احكيلى من الأول علشان افهم
آل إيه حلمت بالمنتخب و الزفة اللى بتحصل فى شارع جامعة الدول لما يكسب المنتخب و المصيبة إن اللى جاب الجون هو الواد حمادة ابنى شفتى المصيبة
مصيبة إيه بس ده حلم حلو قوى
طبعا ماهو اللى ميعرفش يقول عدس ماهو انتى مسمعتيش الراجل إياه قال إيه فى تفسير الكابوس
ضحكت إعتماد قال إيه الراجل يا ستى
قال إن مستقبل إبنى فى الكورة شفتى الداهية اللى انا فيها ده الواد الحيلة اللى طلعت بيه من الدنيا
أنا مش فاهمة حاجة مصيبة إيه !! و داهية إيه
!!
إيه يا إعتماد هو انتى فى دنيا تانية مانتى عارفة إن أنا حلم حياتى الواد يتعلم و يفلح و لما يتخرج يهاجر فى أى بلد بره و يرجع لبلده تانى بعد 20 - 30 سنة و يكون معاه جايزة نوبل زى أحمد زويل كدة مش تقوليلى كورة
أهو اللى بتقوليه ده هو الهبل بعينه الواد يتعب و يذاكر و ياعالم و بعدين يهاجر علشان يرجع بنوبل بعد 20 - 30 سنة يامين يعيش إنتى عبيطة
مش احسن من الكورة ؟!!!؟
لأ طبعا مش أحسن هو انتى مش عايشة فى الدنيا ممكن تقوليلى كام واحد من الشباب مربى شنب زى زويل بتاعك ! لكن كل الشباب حالقين شعرهم زى الواد زيدان و وائل جمعة
و لا كام واحد بيشوف نشرة الأخبار و لا يعرف فين غزة دى أصلا !! لكن يوم ما أبوتريكة لبس فانلة مكتوب عليها تضامنا مع غزة كل الناس طلعت فى مظاهرات و عملت تبرعات لغزة
و لا عمرها إسكندرية اتقلبت علشان زويل ! زى ماهى مقلوبة اليومين دول علشان الواد الجديد اللى اسمه جدو و الجونين اللى جابهم
و لا شفتى زويل بيطلع كل يوم فى التليفزيون يقول اللى هو عايزه زى شوبير و لا الغندور كأنه تليفزيون أبوهم
هه!!!
هو إيه اللى هه ؟ إنتى لسه هاتستنى 20 - 30 سنة علشان الواد يفلح ده إذا فلح يا شيخه خلى الواد يلعب كورة و يشوف مستقبله
خدت أحلام الكلمتين و قعدت تقلبهم فى دماغها لحد ما روحت البيت
بقولك إيه يا صابر بكره تروح تفك الوديعة
وديعة إيه يا ولية مش دى تحويشة العمر اللى علشان تعليم حمادة و سفره برة بعد مايخلص جامعة
بقولك فك الوديعة و من بكرة تروح تعمل عضوية فى أى نادى الأهلى الزمالك إن شالله حتى السكة الحديد المهم الواد لازم يلعب كورة و يبقى زى أبو تريكة و جدو
طيب و زويل اللى انت معلقة صورته فى كل حته فى البيت
بقولك إيه يا صابر الكورة هى المستقبل يارب يا حمادة يابن بطنى أشوفك و لعيب كبير زى أبوتريكة و يفتحلك الدفاع المقفل و يرزقك يابنى فى كل خطوة بجون
ليست هناك تعليقات:
إرسال تعليق