عم بطاطا لذيذ و معسل - - عمره ما طاطا لغير الله
لما الدنيا بتقسى يمثل - - إنه خلاص سلّم لأضاه
قال إيه خلاص سلّم لأضاه
عارفين أغنية على الحجار عم بطاطا ؟ لما سألنا إشمعنى البطاطا ليه يعنى شبهتوا الإنسان المصرى بالبطاطا ؟
كانت الإجابة إن المصرى فى الأحوال العادية عامل زى البطاطا ملوش طعم و لا لون و لا حتى شكل حلو لكن لما يتعرض للحرارة يطلع أحلى ما فيه و يبقى حلو زى السكر و طبعا الحرارة هنا هى المشاكل و التحديات!!!!!!!!!!.
وجهة نظر برضه
و لأننى من عاشقى على الحجار فكنت بحاول أصدق
لكن على مدار سنين عمرى اللى هم حوالى 30 دلوقتى مشفتش عسل البطاطا إلا فى البطاطا اللى بتعملها أمى ربنا يخليها
أمشى فى الشارع ألاقى ولاد لابسين بنطلونات بحجر ساقط و بنات عمالة تضيق فى اللبس لحد ما اللبس هايتفرتك عليهم من كتر الشياكة طبعا
صحيح من وقت للتانى كنت بشوف حاجات حلوة زى الشمس المنورة بتاعة ساقيةالصاوى , كنت بشوف مدونات فيها كلام معقول , أفلام السينما بقى فيها حاجات مختلفة و مميزة , على شوية جروبات و صفحات على الفيس بوك تنشطك شوية و أول ما أقفل الجهاز أنسى كانت بتقول إيه و أروح أقول لماما عندك بطاطا و لالأ
.........................
و فضلت على الحال ده لحد يوم 25 يوم التحرير و هنا لازم أعتذر لسببين أولهم إنى كنت فاكرة إن الإستجابة هاتكون ضعيفة لكن لقيت عكس كدة تماما
و التانى إنى كنت فاكراه يوم و يعدى لكن لقيته معداش و عداد الأيام لسة شغال و التنازلات عمالة ترخ علينا تخطب ودنا و إحنا مصرين و مصحصحين و محدش عارف يضحك علينا
هنا بس حسيت بالعسل بتاع عم بطاطا إتنفست الحرية فى ميدان التحرير و دقت العسل فى عيون الناس اللى فى الشارع كنت مبسوطة و أنا ماشية فى الشارع و عيون الناس بتحرسنى و تحرس كل واحد فى الشارع
كنت بلف بعنيا فى الشوارع و كأنى بشوفها لأول مرة كنت باشوف الناس و أنا حاسة بالفخر و الزهو كنت بانام مطمنة و أنا عارفة إن الناس بتعمل دوريات فى الشوارع
كنت مبسوطة و أنا سامعة صوت المسجد شغال طول الليل
كنت بحس بالفخر و أنا بعمل شاى علشان الناس السهرانة فى الشوارع
كنت بتنطط زى العيال لما أعمل صينية كيك و أنزلها للناس تحت
ببساطة كنت بحب!!!!!!!
تصوروا طول عمرى باقول إنى بحب مصر لكن أول مرة أحس إنى بعشق مصر إنى بدوب فى ترابها إنى فخورة بمصريتى
أول مرة أفهم كلام مصطفى كامل (( لو لم أكن مصريا لوددت أن أكون مصريا))
أول مرة أعشق علم مصر أنا عايشة حالة من الحب و العشق لا توصف
ماشية زى المجنونة فى كل حته باقول أنا مصرية أنا مصرية
فرحانة بمصر فرحانة بالناس اللى مقدرتش تنزل التحرير فجابت مقشات و قعدت تكنس الشوارع و تلمعها أول مرة أشوف الشوارع بتلمع و ألاقى الناس مش بترمى زباللة فى الشارع و أنا هنا بتكلم عن احياء عادية مش بتكلم عن التحرير
أول مرة أصدق
عم بطاطا يزُك الزكّه - - يُعبر سينا و يفتح عكا
و بيصبر ع الجار السو - - خمسين سنه ويقول دول فكه
عم بطاطا لذييييييييييييييذ و معسل
و أدى الأغنية علشان اللى مسمعش يسمع و اللى ماشفش يشوف و اللى مش مصدق يصدق
