يا عزيزي كلنا أولاد ستين في سبعين
قررت التزام الصمت... والحياد.. والسلبية .... قلت عن نفسي إنني رسميا انضممت مضطرا إلى حزب الكنبة ... 
رفضت الخوض في نقاشات الأص

دقاء... وماذا كانت النتيجة... انني أناقش وأناقش وأناقش... أناقش نفسي طيلة الوقت وتوصلت إلى نتيجة هامة أننا جميعا أولاد ستين في سبعين .... 
نحن إسلاميون نوزع صور الفنانات يعتليهن الفنانون الفجرة.. نحن إسلاميون نتورط في تصريحات طمأنة ثم نضرب بها عرض الحائط.... نحن إسلاميون كنا نشتم عصام سلطان وابو العلا ماضي ونراهم شقوا الصف وفتنوا ويخربون الجماعة ثم الآن هم نجومنا الأول... نحن إسلاميون نكره إنفلات الإخوان وميوعتهم لكنهم الآن حبايبنا وكفاءة... نحن إسلاميون ننتقد التشدد السلفي والجهادي لكنهم الآن يشدون صفنا كالبنيان المرصوص... نحن إسلاميون بعث رسولنا رحمة للعالمين ونحن لا نستطيع مد أيدينا لأبناء وطننا...
نحن ليبراليون نؤمن بالإنسان وحريته لكننا نحتقر معارضينا إذا كانوا إسلاميين ونعتبرهم متخلفين وجهلة وعملاء... نحن ليبراليون نحترم الديمقراطية لكننا نلغيها إذا جاءت بغيرنا.. نحن ليبراليون نكره العسكرة لكننا نستعين بالجيش لفرض كلمته أمام الإسلاميين.. نحن ليبراليون ناس شيك وذوق جدا ، لكننا في جلساتنا الخاصة نصف غيرنا بأفظع النعوت... نحن ليبراليون نؤمن بالشعب لكنه جاهل ومتخلف... 
نحن يساريون لدينا مسحة إنسانية وتعاطف مع الفقراء لكننا لا نخرج قرشا للفقراء ولم نضبط يوما نؤسس جمعية خيرية، نحن يساريون نهتم للعروبة وقضايا الامة ولم نتكلم عن سوريا مرة واحدة ولم نراعي واحدا من آلاف السوريين في مصر... نحن يساريون القدس عروس عروبتنا لكننا نشكك في حماس والجهاد الإسلامي ولا نقابلهم ولا نمد إليهم جسورا لانهم إسلاميون... نحن يساريون لكننا لا نفعل أي شيء على الأرض لفلسطين... نحن يساريون ننفتح على الآراء لكن الوهابيين وباء لا بد من محاربته.. نحن يساريون عادينا النظام القديم لكننا لا نمانع في التنسيق مع عاشور والزند وتهاني ومرتضى منصور وحياة الدرديري....
نحن ثوريون نتعاطف مع حرق مقرات الإخوان ونحاصر الداخلية لكننا ندين محاصرة الدستورية .. نحن ثوريون نريد عزل النائب العام وتطهير القضاء لكننا نتضامن مع القضاة ضد مرسي... نريد قرارات ثورية لكن إن قام بها الإخوان فلا... نريد لمرسي أن يقوض سلطاته لكن في نفس الوقت ألا يسارع ببناء مؤسسات الدولة... نحن ثوريون نرفض قرض صندوق النقد ونعتبره تدخلا أجنبيا لكننا ندير مؤسساتنا الحقوقية الخاصة من أموال الغرب... نحن ثوريون ضد الفلول لكننا ضد قانون العزل غير الشرعي.. نحن ثوريون نهتم للشعب ونريده ان يقول كلمته لكننا نرثي غباء الناس وجهلهم وشرائهم بالزيت والسكر... نحن ثوريون في الميدان والشارع لكننا لا نستطيع اقناع المواطن البسيط لأنه غبي وجاهل... 
الخلاصة ... من كان منكم بلا خطيئة فليرمها بحجر... وكلنا خطائون
الخلاصة... كلنا أولاد ثقافة متخلفة بين العالمين ونحتاج إلى ان نفيق ونبدا التحرك للامام...
الخلاصة ... لا تنظر إلى القشة في عين أخيك .... وتترك الخشبة في عينك...
الخلاصة نهدا شوية ونفكر بالعقل ونتوازن وننتصف من أنفسنا ....

أعلى النموذج

أسفل النموذج

ملونية للثورة شعب يحميها

السؤال الحقيقى إزاى الإخوان وصلوا للمرحلة اللى وصلها حسنى فى 30 سنة فى أربع شور بس
إزاى مقرات الحزب اللى اتحرقت بعد 30 سنة تحرق هنا بعد 4 سنين
إيه كمية الغضب اللى فى الناس دى ناحية الحكم
و محدش من الإخوان يقولى حمدين و البرادعى ربنا يكرمكوا لأن تأثيرهم مش كبير للدرجة دى
لو قلتوا كدة تبقوا عملتوا زى مبارك لما قال اللى فى الميدان جماعات مأجورة تحركهم الإخوان أرجوكم فكروا بشكل مختلف
أنا كنت متأكدة من نجاح المليونية لكن مش للدرجة دى
الإخوان نفسهم كانوا مش واثقين إن الميدان هايتملى من غيرهم
طب الميدان اتملى فعلا و على آخره و الشوارع المؤدية ليه كمان
لحد امبارح جوزى كا بيشتم حمدين و البرادعى و بيقول اللى فى الميدان شوية عيال امبارح صدم و سكت و قاللى دول أكبر من حمدين و البرادعى و ربنا يستر
.
.
لازم نفكر إيه السبب ؟ و محدش يقول الإعلان الدستورى بس
المشهد ملتهب من قبل كدة
الإخوان لازم يفكروا هما عملوا إيه أو معملوش إيه علشان ده يحصل؟
غرور ؟يمكن ... عنجهية فاضية ؟ إحتمال ...... إحساسهم إن البلد بلدهم و إنهم لوحدهو يستحقوها ؟ إذ ربما
.
اللى عايزة أقوله بس لأصدقائى المؤيدين
أرجوكوا متشتموش اللى فى الميدان متقولوش مأجورين و لا بلطجية و لا فلول متغلطوش نفس غلطة مبارك متقولوش إعلام و لا حمدين و لا البرادعى
حاولوا بجد تدوروا على شماعة تانية أو حاولوا بصدق تدوروا على الأخطاء الحقيقية علشان تتصلح
.
.
أقول حاجة كمان ( معلش طولت عيكوا )
الناس خايفة من الإعلان الدستورى لأن اللى اتلسع من الشوربة بينفخ فى الزبادى
يعنى اللى اتلسع من مبارك لازم ينفخ فى الإخوان
و بعدين أصلا الإخوان مش زبادى
الإخوان طول السنتين اللى فاتوا كانوا بيقولوا الحاجة و يرجعوا فيها و يقولوا حاجة و يعملوا عكسها
يعنى ملهمش كلمة حقيقية تقدر تمسكهم بيها
ده بس علشان تقدروا خوف الناس اللى فى الشارع و اللى فى البيوت أضعافهم كمان
يارب أكون قدرت أوصل وجهة نظرى

صلاة الجمعة

مش فاهمة يعنى إيه الشاشة تبقى مقسومة نصين نص لمحمد مرسى و هو بيصلى و النص التانى لطنطاوى و هو بيصلى ........

.

يا إما نجيب شاشة واحدة بس للرئيس و هو بيصلى و اللى هو دلوقتى اسمه محمد مرسى

.

يا إما ( و ده الأفضل بالنسبة ليا شخصيا ) نجيب صلاة الجمعة و بس من غير شخصيات عامة نصور الصلاة من مسجد التلفزيون أو أى مسجد عادى و ننقلها من غير رئيس و لا وزير و لا غفير

.

.

لكن حالة الإنقسام دى متنفعش ... البلد مش ناقصة قسمة

طيب بصوا بقى من الآخر كدة أنا بقالى كتير بسمع بس و بحاول متكلمش لحد مافى كلمة وجعتنى أوى و هى كلمة مع السلامة يا مصر و كأن مصر ركبت التروماى و مش راجعة

.

.

لكل اللى خايفين من الإخوان و من إنهم هايسيطروا على مصر أحب أوضح بس شوية نقط من وجهة نظرى المتواضعة

.

أنا مش هاتكلم فى التاريخ البعيد مش هاقول الفاطميين بنوا الأزهر علشان ينشروا المذهب الشيعى و فشلوا و لا هاقول الهكسوس و التتار و لا كل كلام التاريخ ده لأن واضح إن محدش كتير فينا بيقرا تاريخ

.

.

أنا هاتكلم فى الحاضر اللى كلنا عشناه هاتكلم فى واحد كان اسمه جمال مبارك فاكرينه .. أبوه كان رئيس و كان عايز يمسك البلد بعد أبوه

جمال ده بقى كان معاه كل مؤسسات الدولة كان معاه الشرطة و بعض القضاء و رجال الأعمال و البورصة و الوزارات و المجالس المحلية و مجلسى الشعب و الشورى و حتى موافقة أمريكا و إسرائيل .. و حتى المعارضة وقتها كانت كرتونية خالص و المعارضة المتمثلة فى الإخوان برضو كانت معاه بشروط

مؤسسة واحدة بس مكانتش معاه و هى الجيش بس برضو كانت مش عارفة تعمل حاجة و كانت ضعيفة جدا و كانت هاتقبل بالأمر الواقع

.

من الآخر كدة كان معاه كل مقاليد الدولة و السلطة و حتى رجال الدين و مع ذلك معرفش يسيطر على مصر فى عشر سنين و لا يغسل مخ أهلها و ناسها و لا يقنعهم

و بالرغم من إنه كان بيحاول يقرب من الناس حتى و لو عن طريق الكورة لكن حتى الأولتراس كانوا بيكرهوه

.

. تخيلوا بقى واحد معاه كل ده و فشل عايزين تعرفوا ليه ؟ علشان المصريين كدة دماغهم كدة محدش يقدر عليهم و محدش ينفع يتفرعن عليهم

.

.

تفتكروا بقى الإخوان هايقدروا يسيطروا على مصر فى أربع سنين

لو قارنتوا بين اللى خدوه الإخوان فى مجلس الشعب و بين اللى خدوه فى الرياسة فى المرحلة الأولى هاتتأكدوا إن المصريين مفيش حد هايعرف يتفرعن عليهم

.

.

بدل ماتركزوا على الإخوان و شفيق و نقلب فى الماضى نركز فى البلد دى شوية المركب بتغرق و إحنا بنتخانق و بقول لبعض بكرة تندم يا جميل مع إن الندم هايطولنا كلنا لو متفقناش دلوقتى قبل كمان شوية................ ركزوا فى معركة الدستور هو الأهم و هو الحماية

.

.

اللى بيقول مع السلامة يامصر أحب أقوله مع السلامة إنت يا حبيبى مصر متحبش الناس اللى نفسها قصير

مصر موجودة و الإخوان هاتمشى و اللى هايجى بعدهم هايمشى و يفضل بس مصر

خلص الكلام سلام

بأمارة اية فية تغيير

لما المشير يبقي الكبير.........

لما عنان يبقي الأمير............

لما الجنزورى يبقي الوزير...........

بأمارة اية فية تغيير

لما الشيطان يبقي الضمير.....

لما الفلول ترجع تدير.............

لما الفقير يفضل فقير............

بأمارة اية فية تغيير

لما الكبار ياخدوا الفلوس........

لما البوليس يرجع يدوس........

لما عكاشة يرجع يبوس............

بأمارة اية فية تغيير

لما المحامي يبقي ديب.........

لما القانون يفضل بغيب.............

لما الجروح ترفض تطيب..........

بأمارة اية فية تغيير

لما الطريق يبقى ضباب.........

لما الأمل يبقى سراب..........

لما الجمل تكله الذئاب...........

بأمارة اية فية تغيير

لما الكنايس تتحرق...............

لما كلامى يتخنق.......

لما الأمانى تتسرق...............

بأمارة اية فية تغيير

لما الفتن تبدأ تشيع.............

لما السفييه يرجع يذيع..........

.وإحنا وراه زى القطيع.............

بأمارة اية فية تغيير

لما القانون يبقى كفيف.........

لما الشيطان يبقى حليف......

لما جمال يبقى شريف..........

بأمارة اية فية تغيير

دقيقة حداد

أنا مش هاتكلم و أصلا ماليش نفس أتكلم أنا بس حبيت أحكى موقف حصل مع صديق سافر لجنوب أفريقيا فى مهمة عمل و ده نص الحوار اللى قاله و الحكم لصاحب الحكم
عندما اسافر الى بلد جديد اول ما ابحث عنه هو المسلمين وكيف يتعاملون مع غيرهم وهم أقلية وكيف يعاملهم الغير وما مدى حدود حريتهم؟ فوجدت مسلمين اقلية3% ولهم مساجدهم الكبيرة ولايضيق عليهم احد في بنائها ولا في حجابهم ونقابهم ويتعايشون في سلام حقيقي .وساحكي لكم شيئا ربما لا تصدقونه ولكنه حقيقي :في احدى القرى المسيحية في كيب تاون مات احد الناس واقاموا عليه العزاء فجاء امام المركز الاسلامي ومعه جمع من المسلمين ليقدموا واجب العزاء فاستغرب اهل القرية المسيحية لحضور الشيخ المسلم اليهم من قريته البعيدة وجلوسه بينهم يستمع الى تقاليدهم في عزائهم وسألوه في النهاية عن سبب مجيئه,فقال لقد امرن ربي وديني بذلكوكلنا اخوة من آدم ثم ودعهم وانصرفوفي اليوم التالي اتصل بالشيخ اهل الميت وطلبوا منه الحضور اليهم فذهب اليهم فاخذوا يسالونه عن الاسلام وهو يجيب بصدق .فاسلم من اهل الميت 13 شخصا لان الشيخ فهم دينه وذهب ليؤدي واجب العزاء ولم يرفض ان يقف دقيقة حداد..............

المجلس العسكري بالأرقام