يا حلاوة يا ولاد أوباما جاى أوباما جاى
و علشان كدة جامعة القاهرة بتستحمى يا رجالة آه و الله بتستحمى و مش هى بس ده كوبرى الجامعة و تمثال نهضة مصر و الشارع المؤدى للجامعة حتى سور جنينة الأورمان و الحيوانات.
و الله أباما ده فيه الخير خلانا نشوف اللى عمرنا ما شوفناه!!!
طب بزمتكوا حد كان يعرف إن قبة جامعة القاهرة لونها برونزى!!!!
و الله ما كنت أعرف طول عمرى باشوفها رمادى تراب بقى على عادم سيارات أنا ماليش دعوة اللى أعرفه إن لونها رمادى
و الله جاتلى صدمه عصبية و نفسية لما عرفت لونها الأصلى
واضح إن المسئولين قالوا عيب الراجل يزورنا لأول مرة و هايقول كلمة للعالم الإسلامى كله و عاملنا إعتبار و إحنا نطنش طبعا ماينفعش يشوف البلد بترابها كده لازم تستحمى
و هنا و بدأت أكبر عملية إستنزاف لمساحيق التنظيف فى مصرو بالليفة و الصابون و إدعك يا جدع و طبعا لازم نبيض كل حاجة الرصيف و الأسوار و المبانى أمال مش إحنا اللى دهنا الهوا دوكو( حلوة دوكو دى ما علينا)
إيه إنتوا بتقولوا مفروسة من إيه ؟؟
لا لا أنا مش مفروسة خالص
إيه بتقولوا باين عليا
إيه ده و الله هو باين؟؟
إحم عموما أنا معنيش مشكلة لازم نعمل كده لما عمو اوباما يجيى
لكن اللى يفرس فعلا إشمعنى أوباما يعنى هو إحنا ملناش نفس؟؟؟؟
يعنى مينفعش مثلا كل سنة البلد تستحمى ع العيد الكبير ع العيد الصغير على عيد العمال أو حتى نخترع عيد و نسميه عيد الإستحمام القومى و لا إحنا مالناش نفس؟؟؟
آل قبة برونزى آل
و تقولولى مفروسة ليه
