باب النجار مخلع

الخارجية تبلغ فرنسا انزعاجها الشديد لاستخدام العنف مع مواطن مصرى بباريس

هو ده الخبر اللى الواحد كان نفسه يسمعه من زمان علشان يحس إن الخارجية المصرية عاملة للمواطن المصرى المغترب قيمة و تقدر تاخد حقه من التخين

لكن يا فرحة ماتمت الخبر قوّم عليا أوجاع الدنيا
فى لحظة واحدة افتكرت أحداث ماسبيرو و أحداث محمد محمود و طبعا الأحداث اللى لسه طازة أحداث مجلس الوزراء و حاجات كتير بقى ماهو القتل و السحل و الدهس بقى حاجة عادية فى حياتنا

ههههههههه طب بالذمة دى مش بجاحة زعلانين قوى إن فرنسا استخدمت العنف مع مواطن مصرى
طب و احنا إيه مواطنين من كوكب تانى !!!!!!!!!!!!؟؟

إحنا مصرييين البطاقة مكتوب فيها إن الجنسية مصرى و البنت اللى اتسحلت و اتعرت وطبيبة مصرية !!

و الشيخ عماد عفت مصرى و مينا دانيال مصرى
و الله العظيم مصريين

طيب محدش فكر فى رد فعل الفرنسيين و انتوا مقدمين الإحتجاج و صور العنف المصرى كانت على عينك يا تاجر قدام العالم كله.....أكيد هايقولوا علينا عندنا انفصام فى الشخصية
و لا يمكن انتوا بتتعاملوا من وجهة النظر اللى بتقول أدعى على إبنى و أكره اللى يقول آميين

يا بشر قبل ماتتقدموا باحتجاج لأى جهة تانية قدموا إحتجاج لنفسكوا إنتوا رخصتونا و زعلانين دلوقتى إن سعرنا رخيص فى دول العالم
ممكن يتقال إيه تانى؟؟؟؟؟؟
ربنا موجود

لن نستخدم زخيرة حية ولن نستخدم خرطوش طوش طوش طوش طوشششششششششششششش

البلاى ستيشن

lيا عسكر افهموا ..... احنا جيل البلاي ستيشن والسيجا والاتاري ، وعارفين كويس اوى إننا لازم نموت 100 مره قبل ما نهزم الوحش وننتصر ... و بنقفل و بنعيد اللعب من الاول و عادي جدا و مبنزهقش علي فكره ... و هنقفّل الثورة يعني هانقفّلها

يارب حد يفهم

هو ده الكلام قانون الطوارئ يا سلام

اما المجلس بتاعنا ده طلع لعيب بشكل؟

فهم الشعب انه معاه ضد مبارك .

وفهم مبارك انه معاه ضد الثورة.

.وفهم الإخوان انه معاهم ضد الفلول و الأحزاب.

.وفهم السلفيين انه معاهم ضد الكفار.

.وفهم الثوار انه مع مدنية الدولة و المبادئ الفوق دستورية ضد الإسلاميين.

.وفهم الفلول انه معاهم ضد التغيير؟!!!!!!!!!!!

وفهم بتوع التغيير انه معاهم ضد الفلول.

.و سابهم يطحنوا بعض احلي طحن.

.وبعد ما قعدهم كلهم علي حجره رماهم كلهم في الزبالة و خلا الناس تتحايل عليه انه

يمسك الحكم و يعلن الطوارئ لإنهم فقدوا الثقة في كل دول

إبراهيم عيسى يكتب: نفهم وبعدين نقطع

إبراهيم عيسى يكتب: نفهم وبعدين نقطع

طالما ربنا أمرنا بأن نقطع يد السارق، يبقى نقطع، لكن على الأقل نعرف أنه لسنا نحن المسؤولين عن القطع حتى نفعلها بأنفسنا كما يفعل الشارع المصرى هذه الأيام فى أكثر من حادثة إجرامية تسمح لنا باتهام المجتمع بالتوحش وبالجهل معا!

لو أن هؤلاء المتحمسين الذين حاصروا بالمئات وربما الآلاف، بيت بلطجى أو أمسكوا بحرامى وقطعوا يده كانوا قد قرؤوا كتابا واحدا فى الشريعة لأدركوا أنهم وقعوا تحت طائلة عقوبة الشريعة نفسها، ومن المفروض أن تُقطع يد كل واحد فيها «وَكَتَبْنَا عَلَيْهِمْ فِيهَا أَنَّ النَّفْسَ بِالنَّفْسِ وَالْعَيْنَ بِالْعَيْنِ وَالأَنفَ بِالأَنفِ وَالأُذُنَ بِالأُذُنِ وَالسِّنَّ بِالسِّنِّ وَالْجُرُوحَ قِصَاصٌ فَمَن تَصَدَّقَ بِهِ فَهُوَ كَفَّارَةٌ لَّهُ وَمَن لَّمْ يَحْكُم بِمَا أنزَلَ اللّهُ فَأُوْلَئِكَ هُمُ الظَّالِمُون» (المائدة 45).

هؤلاء الذين يتخيلون توهما أنهم ينفذون شريعة الله يرتكبون جريمة كاملة تعاقب عليها هذه الشريعة بنفس جنس العمل، لكن الجهل يعمى ويُصِمّ.

أنا واثق أن كثيرا جدا من الطيبين الذين التفوا حول قاطعى أيدى البلطجية، مهللين فرحين مباركين فى لحظة هوس وحشية ورغبة فى الانتقام من الخوف الذى زرعه هؤلاء البلطجية واللصوص فى قلوب الناس فى الحى أو البلد، لا يعرفون عن الشريعة شيئا، وما يحشو عقولهم هو كلام سمعوه صدفة من هنا أو هناك، لكن ما الذى يجعل الناس يلجؤون إلى العنف والوحشية المتمسحة بالدين فى مواجهة البلطجية والحرامية؟

- فشل الجهاز الأمنى وعجز وزارة الداخلية عن الإمساك بزمام الأمور وإعادة الانضباط إلى الشارع المصرى، خصوصا أن الشرطة لا تعطى أى أمل للناس فى قدرتها على العودة، بل وتدير ظهرها لشكاوى الأهالى من الحرامية والبلطجية، ويجد الجهاز الأمنى حججا كثيرة فارغة لعجزه، مما يستفز الناس للحركة بعد يأسهم من شلل الأمن.

- هذا الحديث اليومى المتصاعد من حناجر وميكروفونات دعاة وخطباء عن تطبيق الشريعة منح شرعنة للعنف، أضفى على تصرفات همجية صفة التدين وأوهم مرتكبيها أنهم منفذو شرع الله.

- الروح العدوانى الذى يسود جوانب كثيرة من حياتنا بعد ثورة 25 يناير، ربما بسبب فهم مغلوط للحرية أو غياب ثقافة المسؤولية، أو تعبيرا عن قهر وقمع وإهانة كرامتهم سنين طويلة، فيأتى العدوان والتوحش انتقاما فى غير محله لغير مستحقيه فى غير وقته.

لكن اللافت هنا أن ما ارتكبه الأهالى من قطع يد يخالف الشريعة ليس فقط لأنهم نفذوه بأنفسهم وهذا ما يضعهم تحت طائلة العقوبة نفسها، بل لأنهم كذلك خلطوا بين حد الحرابة وحد السرقة، فالرجل الذى سرق توك توك من الطريق العام لا ينطبق عليه حد قطع اليد مثلا، ونفهم من الفقيه الراحل السيد سابق فى كتابه الأهم «فقه السنة» أن السرقة نوعان، الأول ما يوجب التعزير (وهى العقوبة التى يفرضها الحاكم، أى عقوبة مدنية طبقا لقانون وضعى)، والثانى ما يوجب الحد، ثم يورد الحديث النبوى الذى رواه أصحاب السنن والبيهقى وصححه الترمذى «ليس على خائن (نصاب مثلا) ولا منتهب (من يأخذ المال غصبا وعلنا وبالقوة) ولا مختلس (من يخطف المال علنا ويهرب به) قَطع»، ثم من شروط تطبيق الحد على السارق أن يكون المال المسروق فى حرز (لو سرق أحدهم جاموسة من الغيط لا

تُقطع يده ولو سرقها من الزريبة تُقطع ولو سرق سيارة من جراج تُقطع ولو من الشارع فلا تُقطع)، واختلف الفقهاء فى ما لو اشترك اثنان فى نقب دار فدخل أحدهما فأخذ المتاع وناوله الآخر وهو خارج الحرز، فقال مالك والشافعى وأحمد «القطع على اللص فى الداخل ولا قطع للص فى الخارج»، وقال أبو حنيفة «لا يُقطع منهما أحد، بل إن السرقة من بيت المال (وهو فى حالتنا العصرية المال العام أو مال الدولة) لا توجب قطع يد السارق»، فضلا عن القاعدة الأهم أن لا يكون السارق محروما أو جائعا أو محتاجا أو مجبرا، فضلا عن أنه لا قطع يد زوج سرق من زوجته أو أب من ابنه أو العكس، حتى الشغالة اللى فى بيتك ومتخيل أنك لو هددتها بقطع يدها لن تسرقك، فالشرع لا يقطع يدها!

وهكذا عشرات المسائل المحيطة بقطع اليد تجعل العلماء والقضاة يختلفون ويتحيرون فى التطبيق، بينما الإخوة فى بولاق أو كفر الشيخ فاكرينها مسألة سهلة أن يقولوا «هذا حرامى هيا بنا نقطع يده»! بينما لو قرؤوا أو فهموا شرع الله لأدركوا أن هناك إجماعا من الفقهاء والعلماء على أنه يحق للقاضى أن يلقّن السارق ما يُسقِط الحد، عن عمر رضى الله عنه أنه أتى برجل سرق فسأله أسرقت؟ ثم أضاف عمر: قل لا، فقال لا، فتركه.

عمر هو الذى أمر الحرامى أن ينكر وينفى أنه سرق وتركه دون أن يمسك فيه فرحا بقطع يده تطبيقا لشرع الله، بل إن شرع الله هو الذى طلب من عمر أن يملى على الرجل (قل لا)

بيردوا الجميل

10 محامين كويتيين تطوعوا لرد الجميل و الدفاع عن مبارك

خبر بصراحة مستفز

رد الجميل علشان مبارك دافع عن الكويت ده على أساس إنه شال الفرفر و خد معاه جيمى و راحوا يدافعوا عن الكويت

هو لا حارب و لا اتصاب

جنود مصر و الجيش المصرى هى اللى سابوا حالهم و محتالهم و راحوا يحاربوا فى حرب لا ناقة لهم فيها و لاجمل

جنود مصر منهم اللى مات و منهم اللى اتصاب علشان يدافعوا عنكم يا بشر

شعب مصر هو اللى رحب بيكم فى شوارع القاهرة هربانين , و بعت ولادوا يحربوا بدلا منكم

إحنا اللى عملنا كدة مش مبارك

مبارك اصدر قرار و قبض الثمن

بس اللى ماتوا و اللى اتصابوا و اللى اتربى يتيم و اللى اترملت بسببكوا ماخدوش حاجة بالعكس مبارك داس عليهم و على شعب مصر كله

و جيمى كان عايز يركب و يدلدل رجليه

افهموا يا تييييييييييييييييييييييت

يا شماتة أبلة ظاظا فينا

كدة اصبحت فوضى

حرائق أمن مركزى

قصة عبيطة بين ولد هايف و بنت أهلها مربوهاش عملت فتنة بين مسلمين و مسيحيين

مظاهرات فئوية منها اللى على حق و منها اللى جاية فى الهايفة و بتتصدر

بلطجية مسيطرين على الشوارع

ذيول النظام بتلعب بينا الكورة و احنا ساكتين و بنساعده كمان

الثورة المضادة شكلها كده بتنجح و ربنا يلطف

زمان كل واحد من النظام القديم قاعد فى بيته و بيضحك علينا

زمانهم بيقولوا فى سرهم روح يا ناكر خيرى بكرة تعرف زمنى من زمن غيرى

فى ناس فى الشارع بدأت تشتم فى الثورة و سنين الثورة و اليوم اللى بدأنا فيه نعمل ثورة

البواب فى الرايحة و الجايه بيقول المفروض الجيش يضرب التحرير بالنووى , معتقدش إنه عارف يعنى إيه نووى أصلا بس هو مبقاش طايق يبص فى خلقتى

كدة مينفعش لازم نسكت خالص شوية و نفكر و نحسب كل حاجة بتتقال علشان كده غلط

كدة بنهد البلد

كدة بندى فرصة لبلطجية الحزب يكسروا فينا و ادينا شفنا اتنين من الأهالى المحرضين على هدم الكنيسة فى صول كانوا مخبرين امن دولة و ده بشهادة بقية الأهالى

البلطجية اللى بهدلوا الدنيا فى منشية ناصر كانوا محسوبين على عمو فتحى سرور و لسة

مش بقولكم يا شماتة أبلة ظاظا فينا

أمن الدولة هايحرق البلد قبل ماهو يتحرق و ربنا يستر أنا عمرى ماكنت متشائمة و لا من أصحاب نظرية المؤامرة

بس أنا دلوقتى متشائمة و متغاظة جدا كل ما أفتكر فى الناس إياهم و هم بيتسلوا بينا

و اسمحولى إحنا سمحنالهم بكدة

أقولكم حاجة أنا شكلى هاجيب ضرف المدونة دى و أقفل التليفزيون و النت و أقعد فى بيتنا

ياااااااااااااااااااااااااااااا شماتة أبله ظاظا فينا

يالهوييييييييييييييييييييييييييييييى يا خرااااااااااااااااااااااااابى

يا حالولى ياحالولى ( 25 يناير)

هيه هيه هيه

لولولولولوى

جرانة فى الزنزانة

عز نايم على البرش

العادلى فى الزنزانة

المغربى فى السجن

مطلوب من كل المساجين اللى فى السجن يسحلوا الناس دى و يضربوهم على قفاهم فى الرايحة و الجاية

مطلوب تخليهم ينضفوا الحمامات

و الأم علشان خاطرى علشان خاطرى خليهم يشربوا من ميه الحنفية

أرجوكم ميه الحنفية ميه ميه

و أنا هابعتلهم قفصين فاكهة من المزروعين بالمجارى حاجة أورجانيك

عقبال بقية الشلة يارب قولوا آمين

آمييييييييييييييييييييييين

نقطة و من أول السطر

أنا كدة مش فاهمة . ليه مظاهرات لرد الإعتبار للريس؟

ليه نقوله إحنا آسفييين ياريس؟

أولا أنا مش آسفة لازم هو اللى يتأسف و يعتذر ما بقى له من العمر

يعتذر على الشهداء

يعتذر عن كنيسة القديسسين

يعتذر عن الأطفال اللى عندهم سرطان و بدل ما نحاكمه لمينا من بعضنا و عملنا مستشفى 57

يعتذر عن الزرع اللى بالمجارى

يعتذر عن المبيدات المسرطنة

يعتذر عن العشوائيات

يعتذر عن صخرة الدويقة

يعتذر عن ال 1500 اللى ماتوا فى العبارة و حقهم ضاع و معرفنا ش ناخد بحقنا و حقهم

يعتذر عن رجال الأعمال اللى أخذوا فلوس الناس و هربوا

يعتذر عن خالد سعيد و سيد بلال و الآلاف اللى ماتوا بنفس الطريقة من غير ما نعرفهم

يعتذر عن الغاز اللى بنبيعه لإسرائيل بثمن بخس و الناس بتقف طوابير علشان الانبوبة

يعتذر عن الفتنة اللى حصلت مع الجزائر

يعتذر عن إحتكاره للإعلام الحكومى و الصحف اللى بيقولوا عليها قومية

يعتذر عن طوابير العيش

يعتذر عن عدم زراعة القمح و إستيراد قمح درجة خامسة

يعتذر عن فساد التعليم

يعتذر عن الشباب اللى ماتوا فى الهجرة الغير شرعية علشان يسيبولوا البلد و يهجوا

يعتذر عن الناس اللى جالهم تيفود علشان المية بالمجارى و إحنا فى بلد النيل

يعتذر علشان محلش مشكلة دول حوض النيل

يعتذر علشان إعتبرنا ورث يسيبه لإبنه

يعتذر

يعتذر

يعتذر

يعتذر و يعتذر و يعتذر.....

يفضل 20 سنة يعتذر قصاد 20 سنة فساد

و لاحظوا إنى قلت 20 سنة مش 30

لأنى عارفة إنوا كان راجل كويس فى الأول و إنوا أحد قادة حرب 73 و كل الكلام الأمور ده

أما بالنسبة لرد الإعتبار فاحنا معملناش حاجة , هو اللى عمل فى نفسه كدة لما سمح للفساد إنه ينتشر و يتوغل فى كل حاجة لحد ما بقى كيف عند المصريين

أنا مش هاعتذر , و لو هو حياته متوقفة على إعتذار يقف قدام المراية و يعتذر لنفسه

خلص الكلام ..... سلام

بالترتيب كلوا هايسقط النظام

يا عرب يا شرق أوسط مش هاينفع كده

إنتوا كده هاتفطسوا مننا و إحنا مش هانحس بيكوا بلد بلد من فضلكوا علشان نعرف نركز

دا حتى الجزيرة مش ملاحقة عليكوا اليمن , الجزائر , فلسطين , الأردن و زاد و غطى عليهم إيران

أهى دى جديدة بقى

واحدة واحدة بن على طلع فى جمعة يناير

و مبارك طلع فى جمعة فبراير

مش لازم كلنا نتسابق على جمعة مارس

أنا باقول نبدأ باليمن الناس هناك غلابة بقالهم 33 سنة صابرين يا عينى

نخلصهم و نطلع على الجزائر

الأردن و سوريا جيران ممكن يشتركوا فى شهر واحد

إيران بقى عايزة شهرين لوحدها كدة و ربنا يقويهم

للأسف فلسطين لازم تستنى لأنها مش هاينفع تعمل حاجة لوحدها و لازم اللى حواليها يتحرروا الأول علشان نحررها

لازم نشيل كل الناس اللى خايفة على نفسها و كراسيها

لازم نشيل كل الزعماء الحلفاء لأمريكا و إسرائيل الأول

تحرير فلسطين عايز ترتيب من عقل ديب

و بما إن الديابة اللى موجودة دلوقتى حلفاء و أصدقاء لإسرائيل فلازم نسقطهم الأول

و ربنا يوفقنا جميعا كل واحد عرف دوره إمتى ؟

يالا بينا

كدة مش هاينفع ( 25 يناير )

كدة مش هاينفع يا أخونا

أنا تليفونى إتحول لسنترال مركزى

اللى يتصل يقول شفتى جمال و علاء مسكوا فى بعض

و اللى يقول مبارك فى غيبوبة أصلوا حز فى نفسوا خناقة علاء و جمال

و اللى يقول شوفتى العادلى طلع متجوز مين؟

و اللى يقول شوفتى نظيف عمل إيه فى مراته الاولى الله يرحمها

إييييييييييييييييه؟؟؟؟؟؟؟؟؟؟

إحنا فضينا و لا إيه؟؟؟!!!!!!!!!!!!!!

لوك لوك لوك أنا مبحبش كدة ثم إن إحنا لسة بنقول ياهادى

أنا ميهمنيش حاجة من كل اللى راحوا إلا إنى أرجع فلوسنا , مالى أنا بقى بغراميات علاء و هو مراهق ؟ و لا بإن حبيب العادلى متجوز فلانة اللى كانت زوجة فلان ؟ هو مين اللى تسبب فى ذل الناس و قتلهم العادلى و لامراته؟

ثم علاء و جمال مسكوا فى بعض أنا مالى ؟ ما يولعوا بجاز هما الإتنين

من الآخر علشان نبقى واضحين

1- عايزين فلوسنا

2- عايزين نبص لقدام و نبنى البلد دى , مش هانبنيها بالإشعات حتى لو الكلام حقيقى طالما مش هايفيدنا نسك عليه.

3- عايزين نفضل واعيين مش عايزين نشمت الأعادى فينا

4- عايزين ننتخب

ننتخب أى حاجة و كل حاجة عايزين ننتخب من أول رئيس الجمهورية لحد الزبال اللى بيكنس الشارع .

عايزين نتعلم ثقافة الإنتخابات

عايزين نتعلم حاجات كتير

5- عايزين نفتح الأدراج و نخرج الأبحاث اللى دوبها التراب و الإهمال.

6- عايزين نعمل أحزاب محترمة بلاش الموجودة دى خالص إنسوها.

7- عايزين نعمل جمعيات أهلية صح مش بتاعة ماما سوزان.

8- فككوا من النقابات الموجودة دى خالص عايزين حاجات معبرة عننا.

كلمة صغيرة بس للعمال الست اللى باست إيد ماما سوزان دى شيلوها و إرموها

9- حاجة كمان بس بتحز فى نفسى بقالها كام شهر عمو اللى هايعمل مسلسل ب 80 مليون ده هو كمان شيلوا و إرموه, 80 مليون قرد يركبوه .

10- ......

11-.......

12-..........

مش عارفة حد عنده أفكار تانية ؟ اللى عنده يقول.......

بس دلوقتى أنا هامشى علشان هاعمل إنتخابات على هناكل إيه النهاردة؟

مش أنا بقول إحنا شرقانين إنتخابات

هيييييييييييييييييييييييييييييييييييييييييييييييييييه

مبروك لكل مصر .....مبارك مش فى القصر

مبروك لكل مصر ....مبارك مبقاش فى القصر

أنا مبسوطة و متغاظة جدا

مبسوطة ليه ؟ سؤال غريب مجاوبش عليه

أما بقى متغاظة ليه ؟ علشان الخبر قال إن الرئيس حسنى مبارك و عائلته ركبوا الطيارة و راحوا بعيد

يعنى إيه ؟ هو مبارك بس اللى كان مطلوب إحنا كنا بنقول يسقط النظام

النظام يعنى النظام بكل ما فيه و أولهم المطبلتية بتوع النظام

رؤساء تحرير الصحف القومية اللى سخروا قلمهم لمدح النظام

مذيعين التليفزيون المصرى اللى قبلوا على نفسهم يطلعوا يقولوا أنصاف الحقائق

كل إعلامى خاص طلع يهبط فى الثورة بحجة إنو خايف على البلد زى مذيعى برنامج 48 ساعة و دلوقتى بيصفقوا للثورة

و غير المطبلتية فى القطط , أيوة قطط النظام

أحزاب المعارضة اللى إدت للنظام شرعية و اللى ياما عملت صفقات مع النظام علشان كرسى فى مجلس الشعب

و بيقولوا إنهم عايزين يغيروا البلد و هم متحجرين فى أحزابهم

القطط اللى كانت بترضى بأى فتافيت يرميها الحزب اللى كان حاكم

و طبعا الفئران اللى هى أول حاجة بتنط من المركب لما يغرق

رجال الأعمال اللى إستفادوا من الحزب و مع أول يوم مظاهرات خافوا و نطوا بفلوسهم برة المركب

كل دول مش عايزنهم مش عايزين نشوفهم مش عايزينهم يتنفسوا الهوا اللى إحنا بنتنفسوا مش لازم يحسوا بالحرية اللى إحنا حاسين بيها لأنهم من الأول إختاروا إنهم يكونوا عبيد

كل دول كان لازم يركبوا الطائرة الرئاسية و يمشوا

عم بطاطا لذييييييييذ و معسل ( 25 يناير )

عم بطاطا لذيذ و معسل - - عمره ما طاطا لغير الله

لما الدنيا بتقسى يمثل - - إنه خلاص سلّم لأضاه

قال إيه خلاص سلّم لأضاه

عارفين أغنية على الحجار عم بطاطا ؟ لما سألنا إشمعنى البطاطا ليه يعنى شبهتوا الإنسان المصرى بالبطاطا ؟

كانت الإجابة إن المصرى فى الأحوال العادية عامل زى البطاطا ملوش طعم و لا لون و لا حتى شكل حلو لكن لما يتعرض للحرارة يطلع أحلى ما فيه و يبقى حلو زى السكر و طبعا الحرارة هنا هى المشاكل و التحديات!!!!!!!!!!.

وجهة نظر برضه

و لأننى من عاشقى على الحجار فكنت بحاول أصدق

لكن على مدار سنين عمرى اللى هم حوالى 30 دلوقتى مشفتش عسل البطاطا إلا فى البطاطا اللى بتعملها أمى ربنا يخليها

أمشى فى الشارع ألاقى ولاد لابسين بنطلونات بحجر ساقط و بنات عمالة تضيق فى اللبس لحد ما اللبس هايتفرتك عليهم من كتر الشياكة طبعا

صحيح من وقت للتانى كنت بشوف حاجات حلوة زى الشمس المنورة بتاعة ساقيةالصاوى , كنت بشوف مدونات فيها كلام معقول , أفلام السينما بقى فيها حاجات مختلفة و مميزة , على شوية جروبات و صفحات على الفيس بوك تنشطك شوية و أول ما أقفل الجهاز أنسى كانت بتقول إيه و أروح أقول لماما عندك بطاطا و لالأ

.........................

و فضلت على الحال ده لحد يوم 25 يوم التحرير و هنا لازم أعتذر لسببين أولهم إنى كنت فاكرة إن الإستجابة هاتكون ضعيفة لكن لقيت عكس كدة تماما

و التانى إنى كنت فاكراه يوم و يعدى لكن لقيته معداش و عداد الأيام لسة شغال و التنازلات عمالة ترخ علينا تخطب ودنا و إحنا مصرين و مصحصحين و محدش عارف يضحك علينا

هنا بس حسيت بالعسل بتاع عم بطاطا إتنفست الحرية فى ميدان التحرير و دقت العسل فى عيون الناس اللى فى الشارع كنت مبسوطة و أنا ماشية فى الشارع و عيون الناس بتحرسنى و تحرس كل واحد فى الشارع

كنت بلف بعنيا فى الشوارع و كأنى بشوفها لأول مرة كنت باشوف الناس و أنا حاسة بالفخر و الزهو كنت بانام مطمنة و أنا عارفة إن الناس بتعمل دوريات فى الشوارع

كنت مبسوطة و أنا سامعة صوت المسجد شغال طول الليل

كنت بحس بالفخر و أنا بعمل شاى علشان الناس السهرانة فى الشوارع

كنت بتنطط زى العيال لما أعمل صينية كيك و أنزلها للناس تحت

ببساطة كنت بحب!!!!!!!

تصوروا طول عمرى باقول إنى بحب مصر لكن أول مرة أحس إنى بعشق مصر إنى بدوب فى ترابها إنى فخورة بمصريتى

أول مرة أفهم كلام مصطفى كامل (( لو لم أكن مصريا لوددت أن أكون مصريا))

أول مرة أعشق علم مصر أنا عايشة حالة من الحب و العشق لا توصف

ماشية زى المجنونة فى كل حته باقول أنا مصرية أنا مصرية

فرحانة بمصر فرحانة بالناس اللى مقدرتش تنزل التحرير فجابت مقشات و قعدت تكنس الشوارع و تلمعها أول مرة أشوف الشوارع بتلمع و ألاقى الناس مش بترمى زباللة فى الشارع و أنا هنا بتكلم عن احياء عادية مش بتكلم عن التحرير

أول مرة أصدق

عم بطاطا يزُك الزكّه - - يُعبر سينا و يفتح عكا

و بيصبر ع الجار السو - - خمسين سنه ويقول دول فكه

عم بطاطا لذييييييييييييييذ و معسل

و أدى الأغنية علشان اللى مسمعش يسمع و اللى ماشفش يشوف و اللى مش مصدق يصدق

عم بطاطا

تييييييييت ع السريع

الاعلام الحكومي بيقول ان اللي في ميدان التحرير دول قابضين و خونة وعملاء لإسرائيل وأمريكا وقطر والإخوان وايران ومعاهم أجانب وباكستانيين وأفغان، مش ناقص غير يقولوا ان بينهم ..كائنات فضائية