فى يوم من أيام كنت فى زيارة لقرية من قرى مصر
هى قرية من قرى مركز الصف المهم هو موقعها الإستراتيجى ليه بقى عارفين زمان لما كانوا يوصفوا مصر فى كتب الجغرافيا كانوا يقولوا مكان إستراتيجى بوابة أفريقيا و و الرابط بين أفريقيا و آسيا و فى منتصف العالم العربى و كل الكلام الكبير ده
أهو كل قرى محافظة الصف من هذا القبيل فى المنتصف بين مصنعين للأسمنت و مصنع للكوك و مصنع للأسمدة حاجة محترمة جدا تلوث بالجملة و الله يتحسدوا أهل المنطقة عليه
و ياسلام لما تسمع الناس الكبيرة و هى بتحكى إن مرة جه وفد يابانى علشان يقيس نسبة التلوث و يركب فلاتر للمصانع و حاجات كدة المهم الجهاز ده كان بيعتمد على عدد اللفات فى الدقيقة يعنى لما الإسطوانة تلف بسرعة يبقى التلوث كبير
المهم الجماعة اليابانيين يادوب شغلوا الجهاز و الإسطوانة بدأت تلف ورررررررررر بسرعة جدا لحد ما ما اتكسرت شوفتوا الناس دى بتتنفس إيه
طبعا أنا معرفش الموضوع حصل بجد و لا لأ لكن هو بيشرح صورة عامة عن المنطقة
المهم كنت قاعدة بعد المغرب مع الناس اللى أنا بزورهم و فجأة لقيت دخان و نار اتارى فيه نخلة ولعت فى الغيط اللى على الناحية التانية من الترعة و لقيت النار بتزيد و تمسك فى النخلة اللى جنبها
و لما إستغربت و قلت ياجماعة حد يطفيها
قالولى مينفعش أصل النخلة بيعدى فى وسطها كابلات للضغط العالى و الناس خايفة
طب إتصلوا بالمطافى
الناس بصتلى و كأنى كائن فضائى
المهم قلت كدة ماينفعش و عملت فيها أبو زيد الهلالى و إتصلت بالمطافى
ألو المطافى
أيوة يا فندم
لو سمحت عايزة أبلغ عن نخلة بتولع و بتمر جنبها كابلات الضغط العالى و كمان الهوا إبتدى يحدف الشرر على البيوت
اللى جنبها
راح الراجل إتنهد
هيييييه إنتوا فين؟
إحنا فى القرية الفلانية جنب مركز الصف
و حضرتك مين؟
إنت مالك أنا مين فى حريقة برة شغالة
لازم أعرف بيانات سياتك
ماشى أنا فلانة و ده بيت الحاج فلان
طيب حاضر هانشوف هانعمل إيه
بعد شوية ترررن ترررن
ألو بيت الحاج فلان؟
أيوة
هنا المركز هى الحريقة كبيرة أوى يعنى؟
أيوة ياعم كبيرة
يعنى فيه بيوت جنبها؟
أيوة فى بيوت جنبها
و الناس مش بتطفى الحريقة ليه هم مش خايفيين على بيوتهم؟
الله ما طولك يا روح
ياعم الناس خايفة من كابلات الضغط العالى و بعدين هايطولة النخلة من فوق إزاى يعنى؟
طيب طيب إحنا هانتصرف
و بعد شوية لقيت عربية الكهربا جاية آل إيه جاية تفصل الكهربا عن البلد مش عارفة ليه ده على إعتبار إن الحريقة هاتنور البلد يعنى و لا إيه
المهم معرفوش يعزلوا الكابلات فاتصلوا بالنجدة
بعد شوية تانيين جت النجدة و سألت فين بيت الحاج فلان؟
الناس قالتلوا هو حاضرتك عايز الحاج ليه؟
أصل هو مبلغ عن حريقة و إحنا جايين نحقق فى الموضوع
من غير تحقيق يابيه الحريقة أهى و عمالة تكبر
راح الضابط إتصل بالمطافى و قالهم البلاغ صحيح فعلا فى حريقة تعالوا بقى
بعد شوية تالتين جت عربة المطافى و سألت فين بيت الحاج فلان؟
راحوا الناس كلهم كانوا هايكلوا الراجل ملكش دعوة بالحاج فلان الحريقة أهى قدام عنيك طفيها
المهم طفوها
و بعد شوية ترررن تررررن
بيت الحاج فلان؟
أيوة
ممكن اللى بلغ يجى يكمل التحقيق فى المركز
شوفتوا بقى ده ممكن يصل فى بلد تانية غير بلاد العجايب اللى إحنا عايشين فيها
ده فيه دول المطافى فيها بتتحرك علشان قطة ينقذوا قطة من على شجرة
لكن إحنا
إحنا ناس مميزة و الكلام ده ميحصلش غير هنا
ليست هناك تعليقات:
إرسال تعليق